Adegiko Idazkari nagusiaren aurkezpena 2015eko otsailak 5. Prentsaurrekoa

Egoera ekonomikoari buruzko prentsaurrekoa, 2015eko otsaila 5

Egun on eta ongi etorri ADEGIk Gipuzkoako enpresei egin dien Egoerari buruzko Inkestaren aurkezpeneko prentsaurreko honetara.

Ohikoa den moduan,urtea hastearekin batera, enpresei etorkizuneko beren aurreikuspenak eta egoera zein diren galdetu diegu eta, hori oinarritzat hartuta, koiuntura ekonomikoari eta bilakaerari buruzko gure azterketa eta diagnostikoa aurkezten dizkizuegu.

Jada sei urte irauten duen krisialdia bizi dugu , eta Gipuzkoak 2.000 enpresa baino gehiago eta 30.000 enplegu inguru galdu ditu, eta industria-produkzioa ia 30 puntu gutxitu da. Horixe da krisiak utzi digun errealitatea eta hortik abiatuta aurrera egin eta etorkizuna eraiki beharko dugu. Beraz abiapuntu hori da, hasi berria den errekuperazioaren testuingurua.Ezingo dugu hitz egin benetako errekuperazioaz, 2008an genuen enplegu maila lortu arte.

Gauzak horrela, enpresei egin diegun inkestako emaitza esaldi bakarrean laburbildu beharko banu, 2015eko ekitaldi honi baikortasunez eta tentu handiz aurre egiten diotela esango nuke.

Enpresen konfiantza krisiaren aurreko mailetara iritsi da: enpresen % 72ren ustez, merkatuaren egoera gaur egun normaltasunekoa edo susperraldikoa da, zihurganetasunez betetako testuinguru batean.

Barne-merkatuaren kontsolidazioak eta kanpoko dinamismo handiagoak salmenten igoera % +3,0ra arte bultzatu dute aurreko hiruhilekoarekin alderatuta.

Enpresen % 84k mantendu dute edo handitu dute eskaeren maila, baina oraindik enpresen % 36k uste dute beren eskarien maila ahula dela

Aurten urtean enpresek enplegua sortuko dutela diote: urte osoan zehar 5.000eta 6.000 arteko lan postu kopurua .

Kezkarako faktore nagusiei dagokienez, Espainiako merkatuaren ahultasuna da nagusi oraindik ere eta horren ondoren azaltzen dira lan-kostu altuak. Hamar enpresatik batentzat bakarrik,  giro sindikala  ardura sortzen duen faktorea da.

2015ean jarduera ekonomikoa garatuko den ingurune ekonomikoa,  oso ona da, eta primerakoa, nazioarteko eskari sendoa lagun izango bagenu. Hori bai, ez dugu ahaztu behar, gero eta handiagoa dela ziurgabetasuna, batetik geopolitikak sortzen dituen zalantzengatik, eta bestetik, globalizazioaren ondorioz merkatuek izango duten bilakaeragatik.

Beraz,  baikortasuna bai, baina tentuz eta eszeptizismo handiarekin, ez baitakigu 2015etik haratago norainokoa izango den hazkunde ekonomikoaren sendotasuna eta iraunkortasuna.

Euroak izandako balio-galera bizkorra, interes-tasa baxuak (ia hutsalak) eta petrolioaren eta lehengaien prezio baxuak ikusita, alde batetik, Europak, Espainiak eta Euskadik esportazio-kuota areagotzea ekarri beharko lukete eta, bestetik, mugimendu horri barneko eskari handiagoa (kontsumo eta inbertsio handiagoa) gehitu beharko lioke, Europako motor ekonomikoa indartuz.

Euro “merkeak” Gipuzkoari, Espainiari eta Europari eskaintzen dizkion aldeko baldintzek Espainiako eta Europako eskaria handitzeaz gain, kanpoko sektoreak Gipuzkoako BPGari ekarpen handiagoa egitea ahalbidetuko du.

Baina barne-eskaera ere berriro indarrez haziko da honako arrazoi hauek direla eta: enplegua sortu izana, inflazioa tasa negatiboetan egonik, inflazioa baino handiagoak diren batez besteko soldata-igoerak eta aurrezkiarena baino handiagoa den kontsumoaren igoera, eta inbertsioaren portaera hobea.

Faktore horiek guztiak direla eta, Gipuzkoako BPG gutxienez % 2,3ra igoko da 2015ean. Kanpoko eskaeraren ekarpena % +0,5 puntukoa izango da, eta barnekoa, aldiz, 1,8 puntukoa.

Horrekin guztiarekin lotuta, kontuan izan behar da 2014ko azken hiru hiruhilekoetan ere % 2 hazi ginela eta urteko azken hiruhilekorako Eustatek egindako aurrerapenak % 2,4ko igoera urtekotua aurrez ikusi duela Euskadin. Horrek guztiak hazkundearen “abiadura” berreskuratu dela esan nahi du, baina joera-ildo berrian. Horren arabera, 2016. urtearen amaierara arte ez genuke 2008ko BPGa berdinduko.

Gipuzkoako ekonomia munduari irekita dagoen ekonomia da. Garai-aldaketa ezagutu duen munduari zabalik dagoena. Merkatu-ekonomian eta mundu globalizatuan bizi gara. Globalizazioaren ondorioz, gure produktu eta zerbitzuak saldu ahal izateko mundu osoan lehiatu behar dugu. Hazkundearen bila joan beharra dago. Merkatuak egunero konkistatu behar dira eta gero eta konplexuagoa da.

Eraldaketa sozialak, berrikuntza teknologikoak eta bira geopolitikoak ezaugarri dituen testuinguru aldakor eta zailean, globalizazioak biltzen dituen erronkei aurre egiten lagunduko diguten palankak eskuragarri izan behar ditugu.

Adegik uste osoa du etorkizuna eraikitzeko honako hauen aldeko gure apustua berritu eta areagotu beharra dugula: lehen mailako ezagutza duten pertsonak, industria aurreratuan eta garapen teknologiko altukoan lan egiten dutenak, garapen teknologiko altua duten eta enpresa-egitura sendoaren baitan sartuta dagoen industrian lan egiten dutenak. Horri esker, ezagutza eta teknologia hori enplegu eta aberastasun bihurtuko litzateke.  Hori guztia konfiantzan oinarritutako proiektu partekatuak dituzten enpresen baitan egin beharko litzateke.

Mila esker